LAOAG CITY – Posible a dumanon iti P1.089 trillion ti nasayang a kuarta gapu iti korapsion iti climate projects manipud idi 2023, basar iti maysa nga environmental group a Greenpeace Philippines.
Karaman ditoy ti P560 billion a nagastos ita laeng a tawen basar kadagiti naibutaktak iti agtultuloy nga imbestigasion ti Senado iti maanomalya a flood control projects ditoy pagilian.
Basar iti datos manipud iti National Integrated Climate Change Database and Information Exchange System, inbutaktak ti grupo nga ita a 2025 manipud iti pakabuklan a P800 bilyon a climate-tagged projects nga inmatonan ti Department of Public Works and Highways (DPWH), mapattapatta a P560 billion ti posible a nasayang iti korapsion.
Iti flood control projects pay laeng, dumanonen iti P248 billion iti baet a basar iti environmental group, adda ti P173 billion ti nasao a balor ti mabalin a nasayang gapu iti panagkunniber.
Mainaig iti daytoy, inbatad ni Greenpeace campaigner Jefferson Chua a saan daytoy a nainkalintegan.
Kunana a saan laeng a mataktakaw ti kuarta ti gobierno no sadinno a minilyon a Pilipino ti makapaspasar ti kumarkaro a krisis iti klima nga inladawanna dagiti agtatakaw ti climate funds iti climate criminals.
Innayon ti grupo a ti korapsion iti flood control program ti gobierno ket katukad ti “obscene plunder” ti kuarta ti gobierno a nairanta tapno tulungan dagiti Pilipino a makapaspasar iti kumarkaro a climate disasters.
