LAOAG CITY – Nakalukat ti Senate Blue Ribbon Committee (BRC) para iti takder da Senador Jinggoy Estrada, Joel Villanueva ken Chiz Escudero.
Ti tallo a senador ket karaman iti irekrekomendar ti Blue Ribbon Committee iti naun-uneg nga imbestigasion para iti posible a panangipila ti kaso nga anomalya kalpasan a naikonektar dagitoy iti maanomalya a flood control projects.
Inbatad ni Senate President pro-tempore Ping Lacson a mabalin latta a mangipaay ti palawag ti tallo nga opisial tapno madalusan ti naganda.
Nakasagana ni Lacson nga ikkaten ti nagan ti tallo a kaduada iti rekomendasion no maallukoy isuna nga inosente dagitoy iti anomalya.
Kuna ni Lacson a saan met pay a pinal ti partial committee report gapu ta uray ti Ombudsman ket awan ti nakitana a direct link kas ken ni Estrada iti P355 million a ghost flood control projects.
Saan a mababalaw ni Lacson no adda ti saan a panaginnuni iti nagbaetan ti kakaduada gapu ta adda ti responsibilidadna a nasken nga aramiden ken no kanayon a panagkakadua ti ipangpangruna ket saanda lattan a mangiwayat ti panagdengngeg.
