LAOAG CITY – Agtultuloy ti imbestigasyon ti Philippine National Police iti pannaka-carnap ti maysa a behikulo a daytoy ket Toyota Wigo iti paset ti Barangay 50. Buttong ditoy ciudad ti Laoag.
Daytoy ti inbatad ni Police Lt. Col. Andrew Rabang, ti chief of police ditoy ciudad ti Laoag.
Segun kenkuana, kalpasan a naawat da ti report nga adda ti nacarnap a lugan ket dagus da a nakikoordinar iti Ilocos Norte Police Provincial Office tapno mai-alarm ti description ti lugan.
Iti panagsawar ti mobile patroller ti Philippine National Police ditoy ciudad ti Laoag ket nakita da ti behikulo iti nadakamat a barangay.
Nupay kasta, kuna ni Rabang a basar iti imbestigasyon da ket adda ti paper bag iti uneg ti lugan a nakaipalaonan ti saan pay a masinunuo a kantidad ti mapukpukaw.
Nagkedked paylaeng a mangipaay ti dadduma a detalye ni Rabang gapu ta manarimaan ti imbestigasyon.
Inpakaammo na a ti suspek ket nagtalinaed iti Philippine National Police ditoy ciudad ti Laoag.
