LAOAG CITY – Inrakurak ti Philippine National Police (PNP) a nakasagana da nga agsungbat kadagiti reklamo nga inpila ni Davao City Acting Mayor Sebastian ‘Baste’ Duterte kontra kadagiti sumagmamano a kameng ti nailian a pulisya.
Daytoy ket adda ti pakainaiganna iti pannakaarestar ti amana a ni dati a Presidente Rodrigo Duterte iti Ninoy Aquino International Airport (NAIA) idi Marso 11 iti agdama a tawen.
Iti maysa a press conference, kinumpirma ni Philippine National Police Public Information Office Chief PBGen. Randulf Tuano nga agur-uray da paylaeng ti direktiba manipod kadagiti maseknan nga otoridad maipanggep kadagiti sumaruno nga agbalin nga addang da mainaig iti isyu.
Karaman kadagiti napilaan ti reklamo da dati a Philippine National Police Chief PGen. Rommel Francisco Marbil, PGen. Nicolas Torre III ken ni dati a Philippine National Police Spokesperson PBGen. Jean Fajardo.
Segun pay ken ni Tuano, maipaayan ti gundaway dagiti karaman a pulis a mangipaay ti sungbat da mainaig kadagiti nasao nga isyu iti kabiitan a panawen kas paset ti proseso.
Kabayatanna, sumangsango dagiti mairekreklamo a pulis kadagiti kaso a kidnapping, arbitrary detention, qualified direct assault, expulsion, ken usurpation of judicial functions iti babaen ti Revised Penal Code, pakairamanan ti maipagarop a panaglabsing da iti Anti-Graft and Corrupt Practices.
