LAOAG CITY – Inrakurak ni Cavite 4th District Representative Francisco “Kiko” Barzaga nga adda ti baro nga House Speaker inton bigat, Septiembre 17.
Iti official Facebook page ket in-post ni Congressman Barzaga nga agpada a good news ken bad news daytoy gapu ta Marcos loyalist met laeng ti mangsukat iti House Speaker.
Naobserbaran a dimmanon laeng ti sumagmamano a minuto ti plenary session ita nga aldaw kalpasan nga inlungalong ni Rep. Zia Alonto Adiong nga insigida daytoy nga isuspenso ken ituloy inton bigat iti oras ti alas-3 ti malem.
Naammoan nga adda dagiti impormasion a nagwaras a maipagarup nga inrakurak ni House Speaker Martin Romualdez ti panag-leave-na kas lider ti Kamara ken temporario a sukatan ni Isabela 6th District Rep. Faustino “Bodje” Dy III.
Mainaig iti daytoy, kinumpirmaran ti sumagmamano nga House sources a ni Isabela Rep. Bodjie Dy ti maelektaran kas baro nga Speaker ita nga aldaw.
Basar iti impormasion, nakipagkinnita ni Romualdez kadagiti party leaders tapno kumpirmaren daytoy a tignay.
Kabayatanna, padpadaanan amin dagitoy no ania ti mapasamak kadagiti sumarsaruno a session iti House of Representative.
