LAOAG CITY – Pormalen a binigbig ti United Kingdom ti Palestinian state.
Daytoy ket babaen ti inruar a video statement ni Prime Minister Keir Starmer iti social media.
Naammoan a sakbay ti anunsio, immunan ti Canada a nagbalin a kaunaan a G7 nation tapno agaramid ti kapada a tignay ken simmaruno ti Australia.
Inbatad ni Starmer a pagtalinaedenna a sibibiag ti posibilidad ti kappia ken ipettengna a ti United Kingdom ket agtultuloy a makilaban tapno maisubli dagiti hostage ti Israel iti pagtaengan dagitoy.
Nupay kasta, basar iti foreign ministry ti Israel a ti pannakabigbig ket awan sabali ti pakaibanaganna no di ket gunggona para iti jihadist Hamas.
Mainaig iti daytoy, inyebkas met dagiti pamilia dagiti nakabalud pay laeng idiay Gaza ti pannakaseknanda iti open letter ken ni Starmer no sadinno a kunada a ti pannakabigbig ket mangkomplikado laeng iti panangikagumaan a mangisubli kadagiti ay-ayatenda iti pagtaengan dagitoy.
Immuna iti daytoy, inkalintegan ni Deputy Prime Minister David Lammy ti takder ti United Kingdom a nangibaga nga ita ti panawen a tumakder para iti two-state solution.
