LAOAG CITY – Saan pay a nangngeg ti gobierno ti boses dagiti agtutubo.
Daytoy ti ikkis dagiti sumagmamano a grupo ken organisasion dagiti agtutubo ditoy probinsia kagiddan iti naiwayat a tignay protesta iti maika-53 nga anibersario ti Martial Law.
Segun ken ni Ms. Angel Galimba, mangidadaulo ti Kabataan Partylist Ilocos, napateg a makibiang dagiti agtutubo kadagiti mapaspasamak ditoy pagilian nangruna iti kumarkaro a korapsion.
Inbatadna a saan a tagabassiten ti kabaelanda nga agtutubo gapu ta dakkel ti impluwensiada kadagiti amin a tignay ti gobierno.
Inlawlawagna a masapul a denggen ti gobierno dagiti arungaing ken panawaganda tapno in-inot a maalay-ayan dagiti parikot a mapaspasaran ti naruay a Pilipino.
Inpasingkedna a saan nga agsardeng ti grupoda nga agtutubo agingga nga adda dagiti makitada nga agkurkurakot kadagiti pundo ti gobierno.
Inpettengna a saan a mabalin nga agulimekda laeng kabayatan a dumakdakkel ti problema ti pagilian imbes ket situtured dagitoy a tumakder ken ilaban ti karbenganda kas maysa nga agtutubo a Pilipino.
Kabayatanna, nagbado dagiti naruay nga agtutubo ti nangisit kas mangipasimudaag ti naladingit nga agdama a mapaspasamak iti gobierno ditoy Pilipinas.
