LAOAG CITY – Rimmuar iti maysa a panagadal a kaadoan kadagiti agtutubo idiay Australia ti agus-usar latta ti social media iti baet a maipawil kadagiti agtawen ti 15 agpababa.
Daytoy ket kalpasan nga addan ti tallo a bulanen ti napalabas sipud inpatungpal ti Australia ti nasao a linteg.
Basar iti eSafety, ti internet safety regulator ti Australia, saan a nagbalin nga epektibo ti panangipatungpal ti age verification kadagiti social media platforms isut gapuna nga adu kadagiti menor de edad latta ti maka-access wenno makaar-aramid ti baro nga account.
Inpakita ti panagadal nga arig saan a nagbaliw ti masansan a panagusar ti social media dagiti ubbing nga agtawen ti 10 agingga 15, tallo a bulan kalpasan a naipatungpal ti linteg.
Iti baet a bimmaba ti bilang dagiti ubbing, adda ti bukud a social media account, nagtalinaed iti sumurok 80 a porsiento ti agus-usar dagiti platform kas ti YouTube, TikTok, Snapchat, Facebook ken Instagram.
Gapu iti daytoy, agtultuloy ti imbestigasion ti Australian government iti sumagmamano a dadakkel a tech companies mainaig iti posible a saanda a panangsurot iti baro a linteg.
Maipalagip a ti Australia ti kaunaan a pagilian a nangipataw ti nationwide ban iti social media kadagiti agtawen ti 15 agpababa kas addang tapno maprotektaran ti salun-at ken kasasaad dagiti agtutubo iti pagilian.
