LAOAG CITY – Inpetteng ni Department of National Defense (DND) Sec. Gilberto Teodoro Jr. a nasken a mapagsungbat dagiti amin a karaman iti flood control scandal.
Daytoy ket tapno maisubli ken ad-adda pay a mapatibker ti panagtalek ti publiko iti gobierno.
Inbatad ni Teodoro a makikaykaysa daytoy kadagiti naruay a Pilipino a mangnamnama nga adda ti mapagsungbat iti maanomalya a flood control ken dadduma pay a public infrastructure project ti gobierno.
Kunana nga adda dagiti sumagmamano a nagan a rumrummuar a rumbeng a mapagsungbat dagitoy gapu iti kumarkaro a korapsion ditoy pagilian.
Inpaganetgetna a maysa a dakkel a krimen ti inaramid dagiti responsable iti multi-billion peso scandal.
Kabayatanna, maawatan ti sekretario ti pungtot dagiti umili a nagturong kadagiti kalsada ken nagpanawagan tapno mapagsungbat dagiti opisial ken contractor a nabenepisiaran iti nasao nga isyu.
