LAOAG CITY – Pinilaan ti Office of the Ombudsman ti siyam a bilang ti kaso a graft iti Sandiganbayan ni Tarlac 3rd District Representative Noel “Bong” Rivera.
Kinumpiraran ni Ombudsman Jesus Crispin “Boying” Remulla ti pannakaipila ti kaso gapu iti conflict of interest nga adda pakainaiganna iti anomalya kadagiti flood control ken infrastructure projects iti lugarda.
Mainaig iti daytoy, inawaganda ni Rivera a “congtractor.”
Basar iti imbestigasion ti grupo a United Pilipino Against Crime and Corruption (UPACC), ni Rivera ken ti asawana a ni Concepcion Vice Mayor Evelyn Rivera ket ti makin-kukua ti Tarlac 3G Construction & Development Corporation. Ti kumpanya a naipaayan dagiti kontrata ti gobierno para kadagiti flood control projects iti Tarlac nga agdagup iti sumurok P600 million no sadinno ket isuda mismo ti nagpirma.
Kabayatanna, ti nasao a siyam a kaso ket pormalen a naipila iti Sandiganbayan ken na-rafflen iti innem a dibision (First, Second, Fourth, Fifth, Sixth ken Seventh divisions) ti anti-graft court para iti pormal a pannakatingiting.
