LAOAG CITY – Pimmusay kabayatan a maag-agasan ti babai a biktima ti pammaltog iti Barangay San Marcelino iti ili ti Dingras.
Ti biktima ket agtawen ti 31 ken residente ti nasao met laeng a barangay.
Segun kenni Police Major Norman Pentang, ti chief of police ti Philippine National Police iti ili ti Dingras, kalpasan a naireport kadakuada ti insidente ket dagus da a nagturong iti lugar iti dayta a gundaway ket naitarayen iti ospital ti biktima ken adda ti tama iti likod na.
Inbatad na nga adda ti tama ti bala ti paltog iti lugan ti biktima ken nakarekobre ti SOCO ti sumagmamano a basyo ti maipagarop a kalibre 45 a paltog.
Kunana nga iti imbestigasyon da ket naggapo ti biktima iti ayan ti negosyo na iti ili ti Solsona ken idi agawiden ket ditoyen a pinalto-paltogan dagiti saan pay a nabigbig a suspek.
Inlawlawag na a kitaen da amin nga anggulo kas no adda ti ummuna a nakariri ti biktim ken dadduma pay a mabalin a nangitunda iti pannakapaltog na.
Mainaig iti daytoy, inlawlawag ni Pentang nga espekulasyon laeng ti publiko nga adda ti pakainagan na daytoy iti isyu ti flood control gapo ta ti biktima ket saan a contractor no diket project engineer iti maysa a construction firm.
Iti agdama ket agtultuloy pay laeng ti naun-uneg nga imbestigasyon dagiti otoridad iti nadakamat a pammaltog.
