LAOAG CITY – Naipaayan ti pammigbig dagiti siyam a pulo ket innem a kameng ti Tricycle Operators and Drivers Association manipud iti nagduduma a Local Government Units wenno LGU’s ditoy probinsia a nangipaay a libre iti panaglugan dagiti atleta, coaches ken sports officials iti kallabes a Palarong Pambansa.
Indauloan ni Gov. Cecilia Araneta Marcos ti pannakaipaay ti “certificate of appreciation”, bagas ken food pack kadagiti nadakamat a drivers dagiti trisikelan.
Segun kenkuana, kaaddoan kadagitoy ti kameng ti TODA ti siudad ti Laoag nupay adda met dagiti kameng ti TODA manipud iti ili a Bacarra, Dingras, San Nicolas ken ti siudad ti Batac.
Inpadanon ti gobernador ti naimpapusoan a panagyamanna kadagiti maseknan.
Kunana a bigbigbigen ti Provincial Government of Ilocos Norte ti boluntario a panangipaay dagitoy a libre iti panaglugan dagiti kameng ti nadumaduma a delegasyon iti Palaro.
Imbatadna a kas ina ti probinsia ket ipagpanpannakkelna daytoy nga inaramid dagiti nadakamat a kakailian.
Kageddan daytoy, inlawlawagna a nairugi dagiti programa ti Metro Ilocos Norte Council wenno MINC babaen ken ni Bise Gobernador Matthew Marcos Manotoc idi isuna ti gobernador ti probinsia.
Inpatalgedna a maitultuloy amin dagitoy ken kalikagumna a mapasayaat pay agsipud dagiti kameng ti TODA ti katulungan ti probinsia iti panagwerret ti negosio.
Ginutigotna dagitoy a mangipadanon iti ania man a kalikagum wenno arungaingda iti Metro Ilocos Norte Council ken no ania ti kabaelan ti probinsia ket ipaayna tapno maparagsak dagiti TODA iti probinsia.
