LAOAG CITY – Dinayaw ni Gov. Cecilia Araneta Marcos ti naisayangkat a “Re-thread: Retazo Eco-fashion Runway a kangrunaan a “culminating activity” ti Provincial Government of Ilocos Norte babaen iti Environment and Natural R.esources Office iti pannakaselebrar ti “environment month”
Mamati ti Gobernador a dakkel a makatulong ti pannakaitultuloy ti nasao nga aktibidad a mangipasigurado iti pannakataginayon ti “world class” nga aglawlaw ti Ilocos Norte.
Mainaig iti daytoy, inpadanonna ti naimpapusoan a panagyamanna kadagiti kabinbinnulig ti gobierno probinsial a mangipatungpal kadagiti programa a mangpatalinaed iti kinapintas ti Ilocos Norte kas kadagiti Local Government Units, National Government Agencies ken dagiti pagadalan.
Inpannakkel ti kaadda ti napintas a panagtitimpuyog ditoy probinsia a mangsaluad iti aglawlaw.
Kunana a daytoy ti agserserbi nga inspirasionna nga agbalin a responsable a mangbantay kadagiti “natural resources” nga inpaay ti Namarsua ditoy probinsia.
Pinasingkedanna nga agtultuloy ti suporta ti gobierno probinsial kadagiti programa nga adda pakainaigan ti pannakasaluad ti aglawlaw para iti sumarsaruno nga henerasion.
