LAOAG CITY – Pormalen nga agikkat ni Senate President Pro Tempore Panfilo Lacson kas Senate Blue Ribbon Committee Chairman nga isu ti mangtaltalantan kadagiti maanomalya a flood scontrol projects ditoy pagilian.
Iti maysa a rakurak, inlawlawag ni Lacson a ti desisionna ket basar kadagiti mangmangngegna a komento manipud kadagiti kakaduana iti Senado ken panagduddua dagitoy iti panangidaulona iti komite.
Inbatadna a dagiti amin a mangidadaulo ti komite ket inelektaran dagiti kakaduana ken agserbi isuna basar iti kalikagum dagiti padana a Senador.
Kunana nga adun dagiti nangipeksa ti pannakadismaya no kasanona nga idauloan ti komite.
Inpaganetgetna a daytoyen ti oras tapno agikkaten ken ited kadagiti dadduma a miembro ti Senado nga iti pagaammoda ket kabaelan nga iggaman ti panagdengngeg iti naur-urnos.
Inpettengna nga awan ti aniaman a kritisismo manipud kadagiti netizens pakairamanan dagiti partisan sectors ti mabalin a makaapektar nga aramiden ti trabahona kas chairperson ti komite ngem no ti bukudna a kakadua ti mangrugi nga agsaritan iti panangimatonna ket nasaysayaat a tumalaw laengen daytoy.
Kabayatanna, iti baet kadagitoy a rakurak, inpakaammo ni Lacson a saan daytoy nga aglippas ti trabahona a labanan ti korapsion manipud kadagiti manangabuso iti pundo ti tattao.
