LAOAG CITY – Ginutigot ni US President Donald Trump dagiti mediators nga iyalisto ti agtrabaho tapno agngudon ti gubat iti Gaza.
Inaramid daytoy ni Trump mainaig iti naikeddeng a panagtataripnong dagiti mediators idiay Egypt tapno iwanwan ti saritaan ti kapia iti nagbaetan ti Hamas ken Israel.
Ti saritaan ket napagnunumoan kalpasan nga immanugot ti Hamas iti dadduma a linaon ti 20-point US peace plan, pakairamanan ditoy ti pannakawaya-waya dagiti nabatbati pay nga hostages ken ti panangipaima ti panagturay ti Gaza kadagiti Palestinian technocrats, ngem agsapsapol iti negosasyon iti dadduma nga isyu.
Nupay kasta, saan a nadakamat iti sungbat ti grupo dagiti kangrunaan a kalikagum para iti pannakaikkat ti armas da ken awan ti agbalin nga akem da iti panagturay ti Gaza iti masangwanan.
Immunan nga inrakurak ni Trump a mamati a marugyan ti pannakawaya-waya dagiti nabatbati pay nga hostages ti Hamas iti Gaza iti kabiitan a panawen.
