LAOAG CITY – Makaawat dagiti agarop maysa a milyon a mannalon ti sag-7 ribo a tulong pinansyal iti babaen ti nailungalong a P6.7 trillion budget para iti 2026.
Daytoy ti inkari ni House Speaker Faustino “Bojie” Dy III kabayatan ti joint hearing ti House Committee on Agriculture and Food nga indaulwan ni Quezon 1st District Representative Mark Enverga ken ti Committee on Ways and Means nga indaulwan met ni Marikina City 2nd District Representative Miro Quimbo.
Inlawlawag ni Dy a ti tulong pinansyal ket maipaay tapno maalay-ayan ti pannakalugi dagiti mannalon gapu iti nababa a farmgate prices ti irik.
Inbatad ni Dy a ti addang ket panangsupusop iti Executive Order No. 93 a temporaryo a pannakasuspenso ti panagangkat ti bagas tapno maprotehiran dagiti produksyo dagiti lokal a mannalon manipod iti oversupply ken nababa a presyo.
Inpakaammo pay ni Dy a kaadoan kadagiti mannalon iti probinsya da iti Isabel ket ilaklako da ti irik iti P8 iti kada kilo, adayo manipod iti P16 agingga P18 a kasapulan tapno makaabrot kadagiti nagastos iti panagtalon.
