LAOAG CITY – Inbatad ni Caloocan Representative Edgar Erice a mabalin nga ag-convene ti House of Representatives iti maysa nga special session tapno matratar ti gakat a mangpapigsa iti Independent Commission for Infrastructure (ICI), nga agim-imbestigar iti flood control projects.
Immapela ni Erice kadagiti kakadua na tapno kumbinsiren ni President Ferdinand Marcos Jr. a sertipikaran na kas urgent measure ti House Bill No. 4453, a mangipaay ti naan-anay a bileg ken mapalawa ti subpoena authority ti Independent Commission for Infrastructure.
Segun kenni Erice, daytoy ket para kadagiti tattao ken iti masakbayan kageddan ti panawagan na a nasken a maipasa kas linteg ti gakat para iti Independent Commission for Infrastructure a ti mismo Presidente ti nangestablisar.
Ti gakat a masertipikaran kas urgent ket isu ti mangipalubos iti Kamara ken Senado a mangaprubar iti maikadua ken maikatlo a pannakaibasa na iti maymaysa nga aldaw.
Ti met sesyon ti Kongreso ket agpatingga agingga intono October 13, 2025 sakbay ti break.
Ummuna iti daytoy, kuna ti agpanpanday linteg nga adda ti nakasarita na a miembro ti Independent Commission for Infrastructure. a nangibaga kenkuana a maaw-awanan ti namnama ken posible ti panagikkat na iti komisyon gapo iti limitado a bileg da kangrunaan na iti contempt power.
