LAOAG CITY – Linawlawagan ni Barangay Chairman Jojo Lorenzo iti Barangay Bengcag ditoy ciudad ti Laoag ti alegasyon nga arig na kanayon a makaaw-awat ti ayuda dagiti kabagyan na.
Daytoy ket kalpasan nga adda ti naawat ti Bombo Radyo a reklamo a maipagarop a masansan a Lorenzo clan ti makaaw-awat kadagiti ayuda nga ipapaay ti gobierno kas iti TUPAD, AKAP wenno AICS.
Segun kenni Lorenzo, adda ti kabagyan na a nakaawat ti ayuda iti kallabes ngem kwalipikado daytoy gapo ta maibilang a PWD.
Inlawlawag na nga iti mismo a pamilya na ket awan pulos ti maaw-awat na nga ayuda ngem iti purok da ket arig na Lorenzo amin ti pamilya isut gapo na nga adda latta ti agbalin a benepisyaryo a Lorenzo.
Mainaig iti daytoy, dagiti agrekreklamo ket makaaw-awat da met iti ayuda isut gapo na a saan na nga ammo ti rason no apay a kanayon nga agreklamo pay laeng daytoy.
Kunana nga uray idi saan pay a kapitan ket adon dagiti ibagbaga dagiti tattao nga agpapada dagiti makaaw-awat ti tulong manipud iti gobierno.
Kabayatanna, binalakadan na dagiti kabarangayan na a mabalin da a mapan kitaen iti Barangay Hall ti listaan dagiti amin a makaw-awat iti ayuda ken no adda ti problema ket silulukat ti opisina na.
