LAOAG CITY – Linukatanen ti Department of Transportation (DOTr) ti dua a baro ken moderno a Public Utility Vehicles stops idiay Marikina City.
Indaulwan ni DOTr acting Secretary Giovanni Lopez ken Marikina City Mayor Maan Teodoro ti pannakalukat ti PUV stop iti paset ti San Roque Park ken iti Concepcion Elementary School.
Inbatad ni Lopez a ti nasao a PUV stop ket pakabenipisyaran dagiti pasahero nga addaan ti rangkap iti bagi ken uray dagiti siklista.
Iti kada PUV stops ket adda ti tugaw a para kadagiti addaan ti rangkap iti bagi ken dagiti masikog.
Adda pay ti CCTV cameras, lightning system, concrete bollards, tactile pavement para kadagiti visually impaired, charging stations, solar panels kasta met iti bike repair stations.
Nakaipan pay ti bike map panels tapno makita no sadinno ti pagsarsardengan dagiti pampasahero a luglugan.
Innayon ti opisyal nga agbalin nga ehemplo ti Marikina City ken agaramid da iti kastoy met laeng iti nagduduma a paset ti pagilyan.
