LAOAG CITY – Ngimmato ti 5.4% ti ekonomiya ti probinsia idi 2024.
Basar iti Philippine Statistic Authority- Ilocos Norte, adda ti pakabuklan a P106.51 a bilyon a pisos ti napastrek ti probinsya basar iti constant 2018 prices.
Naamoan a dakkel ti kontribusyon dagiti nagduduma a sektor iti panagngato ti ekonomiya iti probinsia, kas iti transportation and storage; wholesale and retail trade; repair ti motor vehicles and motorcycle a 52.3%; idinto a 30.9% iti Industry ken 16.8% iti Agriculture, Forestry ken Fishing.
Kadagupan kadagiti amin a probinsia ditoy rehiyon uno, ti Ilocos Norte ti kangatwan ti per Capita gross domestic product a daytoy ket P172,106.
Mainaig iti daytoy, inlawlawag ni Mr. Renz Sanchez, Officer-In-Charge iti nasao nga ahensya ti gobierno, a dakkel a tulong iti maysa a lugar a maamwan ti statistics tapnu isu ti pagibasaran ti gobierno iti pannakadevelop ken pannakaiyimplementar dagiti programa ken proyekto.
Malaksid iti daytoy, makita pay ditoy ti transisyon iti pannakaaramid dagiti paganburutan a nakabase kadagiti ebidensya ken plano.
Karaman ditoy ti Community Based monitoring a maisaysayangkat kadagiti nagduduma a Local Government Units tapno maamwan ti statistics wennu estado ti tunggal sektor babaen ti numero.
