LAOAG CITY – Balligi a naisayangkat ti medical mission iti ili ti Burgos babaen ti Provincial Health Office.
Segun ken Dr. Rickson Balalio, mangidadaulo ti nasao a pagopisinaan, daytoy ket paset ti selebrasyon ti 4Ps family day.
Malaksid iti medical consultation ket nagibunong da pay ti agas ken bitamina, kasta met nga adda ti panagbakuna kontra iti pneumonia kangrunaan kadagiti senior citizen a residente ti nasao nga ili.
Inbatad ni Balalio a makatulong kadagiti residente tapno saan dan a kasapulan ti agturong iti centro nga agpa-agas wenno agpa-check up.
Innayon na a makakissay daytoy ti gastosen da kas iti plete kasta met ti oras dagitoy.
Mainaig iti daytoy, nagpalagip ni Balalio iti publiko panggep ti panangtaripato ti bagbagi, ken insigida nga agpakonsulta nu adda dagiti marikrikna a sintomas ti sakit iti bagi.
