LAOAG CITY – Naipangato iti National Disaster Risk Reduction and Management Council (NDRRMC) ti tukad ti alerto iti Red Alert Status ti sibubukel a National Disaster Risk Reduction and Management Council Operations Center kalpasan ti idadayyeg ti magnitude 7.4 a gingined iti Davao Region.
Basar iti nagbalin a memorandum a pirmado ni Office of Civil Defense Deputy Administrator for Operations Asec. Cesar Odio, epektibo ti estado ti alerto sipod pay idi 12:00 ti pangaldaw idi kalman.
Iti babaen daytoy, nabilin dagiti pannakabagi manipud iti Armed Forces of the Philippines (AFP), Philippine Coast Guard (PCG), Philippine National Police (PNP), Bureau of Fire Protetion, dagiti kameng manipud iti Department of Interior and Local Government (DILG), Department of Social Welfare and Development (DSWD) ken Department of Health (DOH) a mangipaay kadagiti reports-da iti National Disaster Risk Reduction and Management Council para iti al-alisto a koordinasion dagiti ahensia para iti panangsolbar kadagiti kasapulan dagiti naapektaran a residente.
Kabayatanna, malaksid kadagiti nasao nga ahensia, naallukoy pay dagiti dadduma pay nga ahensia ken dagiti lider pakairamanan ti Philippine Institute of Volcanology and Seismology (PHIVOLCS) a makipagpaset kadagiti Virtual Emergency Operations Center para iti monitoring ken assessment iti rehion.
