LAOAG CITY – Maiyur-uray pay laeng ti linteg a para kadagiti Persons with Disability tapno saan dan nga ipakita ti booklet da no gumatang iti agas kadagiti botika a kas kadagiti senior citizens.
Daytoy ti inbatad ni Mr. Christoper King Medina, Disability Affairs Officer IV iti Persons with Disability Affairs Office ditoy ciudad ti Laoag.
Segun kenni Medina, ado dagiti agdamdamag no apay a dagiti Persons with Disabilities ket mangipakita pay laeng ti booklet no gumatang iti agas tapno adda ti diskwento.
Inlawlawag ni Medina nga arig na agpadpada ti prebilihiyo ti Persons with Disabilities ngem kadagiti senior citizen ket ID laengen ti ipakita da gapo ta addan ti linteg para iti daytoy.
Nupay kasta, mangnamnama ni Medina a maipadan to met daytoy a banag para kadagiti Persons with Disabilities gapo ta agpadpada met dagitoy iti sitwasyon.
Innayon na nga aramiden da amin a kabaelan da tapno maipaay iti usto a suporta para kadagiti Persons with Disabilities ditoy ciudad ti Laoag.
Maipalagip a saanen nga ipakita dagiti senior citizen ti purchase booklet da no gumatang dagitoy ti masapol da mga agas kadagiti botika basar iti nagbalin a mandar iti Department of Health (DOH).
