LAOAG CITY – Inbatad ni Engr. Jonathan Corpuz iti National Food Authority ditoy probinsya a manarimaan ti panaggatang da ti irik a naapit dagiti mannalon.
Kuna na a sipud idi Enero ita a tawen ket umaboteni iti 46 a ribo a sako ti irik a nagatang da kadagiti mannalon ditoy probinsya.
Nupay kasta, inpagunam-gunam ni Corpuz a dagiti mayat nga aglako ti irik iti opisina da ket masapol a mapan da agpailista nga umuna tapno naur-urnus ti panagserbi da.
Inpakaammo ni Corpuz a nakaad-adon dagiti naka-schedule a mapan agideliber kadagiti ilako da nga irik iti National Food Authority – Ilocos Norte.
Innayon na a gapu iti kaadon dagiti mayat nga aglako ti irikna iti opisina da ket saan dan a maaramid pay ti mapan agsursur kadagiti nagduduma nga ili wenno ciudad isut gapuna nga iyur-uray da lattan dagiti mapan da ideliber kadakuada.
Mainaig iti daytoy, inbatad ni Corpuz a ti panaggatang da ti irik ket 23 a pisos iti kada kilo ti napintas ti pannakabilag na.
