LAOAG CITY – Silulukat para kadagiti amin a negosyante ti Negosyo center kadagiti nagduduma nga ili ditoy probinsya.
Daytoy ti inbatad ni Provincial Director Amelia Galvez iti Department of Trade and Industry ditoy probinsya.
Inlawlawag na a dagiti negosyo center ket agserserbi kas bassit a Department of Trade and Industry iti bukod da a komunidad a mangidanun ti serbisyo a kasapulan dagiti umili.
Gagem ti nasao a pasilidad ti mangipaay ti tulong ken suporta kangrunaan na dagiti babassit a negosyante ditoy probinsya.
Inbalakad ni Galvez a mabalin ti agkamang dagiti babassit a negosyante iti negosyo center no ado ti problema da maipanggep iti negosyo da.
Innayon na nga adda dagiti programa ken aktibidad a nakasentro kadagiti negosyante ken dagiti consumers.
Kabayatanna, inpakaammo ni Galvez a mangipapaay da pay ti financing solution babaen ti panangiyasideg da kadagiti babassit nga institution nga agpapautang no ti problema dagiti maseknan ket pinansyal.
Adda pay ti ipatpatungpal a training ti Department of Trade and Industry para kadagiti negosyante kangrunaan na dagiti agparikot ti logo, packaging ken marketing.
Inpasigurado pay ni Galvez a napintas ti koordinasyon da iti nagduduma nga ahensya kas iti Department of Labor and Employment ken ti Technical Education Skills and Development Authority tapno mangipaay ti ad-ado nga oportunidad kadagiti umili kangrunaan na ti pannakaitandudo kadagiti lokal a produkto.
