LAOAG CITY – Umabot iti 177 a kilo a basura ti naummong ti City Environment and natural Resources Office ditoy ciudad ti Laoag iti naisayangkat a Coastal Clean-Up Drive iti paset ti Brgy. Calayab ditoy ciudad itay kallabes.
Segun kenni Mrs. Mylene Pascual, mangidadaulo ti City Environment and Natural Resources Office ditoy ciudad, dagiti basura ket pakairamanan ti plastic bottle nga isu ti kaaddoan, Styrofoam, plastic sachet, lata ken metal, mabuong a botelya ken dadduma pay a basura.
Inbatadana a kasapolan ti quarterly a panangiyuswat iti kastoy nga aktibidad tapno ad-ado pay dagiti madalusan nangruna ket problema agingga ita dagiti basbasura.
Mainaig iti daytoy, agbalin a regular daytoy kadagiti amin a barangay saan laeng a ti panagdalos iti igid ti baybay no diket iti arubayan, aglawlaw ken dadduma pay.
Kabayatanna, kunana a kadua da ti City Tourism Office, Office of Agriculture, Community Affairs Office, SK Federated of Laoag, City Disaster Risk Reduction and Management Office (CDRRMO), Bureau of Jail Management and Penology (BJMP), estuydante manipud iti Mariano Marcos State University (MMSU) Kabataan Kontra Droga at Terorismo (KKDAT) Laoag ken dadduma pay.
