LAOAG CITY – Ibilang ti Philippine National Police a nasolbaren ti kaso ti pammaltog a nakatayan ti aglive-in partner ken nakasugatan ti maysa pay nga indibidual iti Barangay 21, San Agustin iti ili ti San Nicolas.
Segun kenni Police Col. Joemar Labiano, ti Provincial Director iti Ilocos Norte Police Provincial Office (INPPO), adda dagiti ebidensya kas kadagiti CCTV footages ken statement dagiti witnesses iti nasao a krimen.
Inlawlawag na a ti binulod ti suspek a motorsiklo iti kampo ket isu met laeng ti nakita iti nakapasamakan ti krimen ken kabayatan ti ipapanaw dagiti suspek iti lugar ketnaala pay iti CCTV camera.
Malaksid iti daytoy, ti testimonya dagiti witnesses ken ti nakalap da nga ebidensya kas iti oras nga ipapanaw ti suspek iti kampo, ti motorsiklo ket agsusurot.
Inpetteng na nga uray kadua da a pulis ti suspek ket saan da a protehiran gapo ta nasken a maipaay ti hustisya kadagiti biktima.
Kunana a posible a saan a maawat ti suspek ti nagbanagan iti relasyon da isut gapo na a naaramid na daytoy a krimen.
Mainaig iti daytoy, inbatad ni Labiano nga adda ti kadua ti pulis a suspek ken isu ti maysa kadagiti im-imbestigaren da pakairamanan ti paltog a nausar gapo ta awan ti insuko ti pulis.
Maipalagip a dead on the spot dagiti ag-live-in partner nga isuda Joshua Madamba, agtawen ti 27, Barangay Kagawad iti nasao a barangay ken ni Eloisa Jane Pagadoan Bonilla, agtawen ti 30 ken maysa nga Online Accounting Staff kalpasan a pinalto-paltogan ti suspek. Iti agdama, nagtalinaed ti suspek iti Ilocos Norte Provincial Jail ken naipila metten ti double murder ken frustrated murder kontra iti daytoy.
