LAOAG CITY – Kalikagom ti Sang. Bayan iti ili ti San Nicolas nga idadaulwan ni Vice Mayor Napoleon Hernando a mapaayaban iti sesyon ti Municipal Health Officer.
Segun kenni Hernando, kalikagomna a maamoan ti maipanggep ti pannakapukaw dagiti medical equipment iti Rural Health Unit.
Kunan, a kas legislative body a mangap-aprubar kadagiti pondo para kadagiti nagduduma a programa ken proyekto ti ili ket rumbeng a maamoan da dagiti mapaspasamak kadagiti nasao a ramit iti laksid a sumagmamano kadagitoy ket donasyon.
Inbatadna nga in aid of legislation ket maamoanda no kasano ti napasamak nangruna ket rumrumuar nga inside job gapu ta awan dagiti nakita a force entry.
Kabayatanna, kinondenarna amin dagiti mapaspasamak a violence iti nasao nga ili nangruna kadagiti pammapatay.
Gapu kadagitoy, kunana a nasken a maipatungpal a naig-iget dagiti peace and order law tapnuo maliklikan dagitoy a klase ti pasamak.
