LAOAG CITY – Natay ti maysa a lalaki kalpasan a naawanan daytoy ti kontrol iti manibela ti motor-na iti paset ti Barangay 20 Tabungao iti ili ti Pasuquin
Ti lalaki ket agtawen ti 41, awanan asawa, ken residente iti Barangay Dilanis iti isu met laeng nga ili.
Basar ti imbestigasion dagiti otoridad, ti lalaki ket dumaldalyasat nga agpa-amianan idinto a kellaat a naawanan daytoy ti kontrol ti manibela ti motorsiklo nga usar na a nangitunda ti disgrasia.
Naamoan a ti lalaki ket nakamaneho iti Yamaha Mio nga agmaris dapu.
Apaman a maaksidente daytoy ket insigida met a naitaray iti balay pagagasan wenno Rural Health Unit (RHU) Pasuquin no sadinno a naideklarar a dead on arrival iti babaen ti attending physician a ni Dra. Janice De Guzman-Zapanta.
Kabayatanna, rumrumuar ti imbestigasion a ti lalaki ket person with disability due to epilepsy, awan ti helmet-na, ken addaan ti influensia ti arak.
