LAOAG CITY – Mangnamnama ni Ms. Helen Rose Domingo, mangidadaulo ti Provincial Sports Development Office nga ad-ado a medalya kangrunaan iti balitok ti maiyawid dagiti atleta ditoy probinsia a makipagpaset iti Batang Pinoy 2025 a maangay idiay General Santos City.
Bukbuklen ti 49 nga atleta ti ipatulod ti probinsia ken makibinnalubal iti Batang Pinoy 2025 idiay Gensan ken 11 met idiay Manila.
Segun kenni Domingo, nagtitipon dagiti atleta manipod iti tallo nga schools division ditoy probinsia kas iti Schools Division of Ilocos Norte, Laoag ken Batac.
Inlawlawag pay ni Domingo a saan amin nga event iti Batang Pinoy ket adda ti pambato ti Ilocos Norte no diket iti laeng martial arts, arnis, gymnastics, swimming, table tennis at athletics.
Mainaig iti daytoy, inbatad na a kadwaen ti medics manipod iti Resiliency Office, DepEd officials, sports development officers, ken dagiti coach dagiti atleta.
Kabayatanna, inpakaammo ni Domingo nga umabot iti tallo a milyon a pisos ti pondo nga inaprubaran ti gobierno probinsial para iti Batang Pinoy.
Malaksid iti daytoy, nangipaay pay ni Gov. Cecilia Araneta-Marcos iti travel allowance ti delegado ti probinsya.
Maipalagip nga iti kallabes ket nakaiyawid dagiti atleta ti lima a balitok a medalya manipod ti gymnastics event.
Kabayatanna, mangrugi ti Batang Pinoy inton Sabado, Oktubre 25 agingga Oktubre 31.
