LAOAG CITY – Nakikaysa da King Charles ken Queen Kamila ken ni Pope Leo XIV iti panagkararag iti Sistine Chapel idiay Vatican City.
Ni King Charles ti kaunaan nga head ti Church of England a naglararag iti sangwanan ti publiko kadwa na ti Santo Papa.
Maibilang kas simbolismo ti panagkadwa a nagkararag ti Santo Papa ken Ari kalpasan ti agarop 500 a tawen sipud naisina ti Simbaan ti Inglatera manipod iti Roma.
Sakbay ti prayer service, naaddaan paylaeng nga immuna ti private audience ti ari ken Reyna iti Santo Papa.
Nagsinnukat met da Pope Leo ken ti Royals kadagiti regalo tapno markaan ti pakasaritaan nga okasyon ita nga aldaw.
Iti biang ni King Charles, inpresentar na iti Santo Papa ti maysa a dakkel a silver photograph ken icon ni St. Edward the Confessor, ti Anglo-Saxon king of England a mabigbig kas “man of great prayer”.
Kas kasukat, inikkan met ti Santo Papa ti ari ti scale version ti mosaic a ‘Christ Pantocrator’ manipod iti cathedral iti Sicily, a naaramid iti Vatican.
Agdama nga idiay Vatican da King Charles kas paset ti official state visit da ken ni Queen Kamila.
