LAOAG CITY – Binabalaw da US Vice President JD Vance ken Secretary of State Marco Rubio ti nagbalin nga addang ti Israel Parliament mainaig iti panangakopar na iti West Bank.
Daytoy ket kalpasan nga inaprubaran dagiti agpanpanday linteg ti Israel ti gakat a paseten iti teritoryoda ti West Bank.
Ti West ket nabayagen a kukua ti Palestine kas paset iti independent state.
Segun kenni Vance, maysa nga “stupid political stunt” ti addang ti Israel.
Inbatad met ni Rubio a ti inaramid ti Israel ket isu ti mangdadael iti plano ni US President Donald Trump a lippasen ti gubat iti Gaza.
Saan pay a nakailanad daytoy iti ceasefire agreement nga ilunglungalong ni Trump.
Naglikudan met ni Israeli Prime Minister Benjamin Netanyahu nga inaprubaran na ti addang ken kunana nga aramid daytoy ti oposition group iti parliamento.
Innayon ti Israeli Prime Minister a ti right-wing Likud party ken ultra-Orthodox coalition ket saan a nagbutos iti daytoy.
