LAOAG CITY – Inpakaammo ni Atty. Charito Malicad, mangidadaulo iti City Tourism Office ditoy ciudad ti Laoag nga umabot iti lima a milyon a pisos ti nailatang a pondo para iti pannakagatang ti lote ti aglawlaw iti Gabu Watch Tower ditoy ciudad.
Segun ken Malicad, nakikordinar dan iti City Planning Office para iti pannakaisagana ti pannakagatang iti lote .
Inlawlawagna a ti maysa nga ar-aramidenda ket ti pannakisarita iti akin-kukua iti lote gapu ta rumrumuar nga adda iti balasiw taaw.
Kuna ni Malicad a saan na a masigurado no kasanot ti kalawana iti magatang a lote ngem daytoy ket ti mismo aglawlaw laeng iti gabu watch tower ti gatangen ti lokal a gobierno.
Inayonna a ti pannakagatang iti lote ket tapno ad-adda pay a mapadur-as iti aglawlaw ti gabu watch tower ken mapagbalin a tourist attraction ken dadduma pay.
