LAOAG CITY – Makaalarma no mapaneknekan a pudno ti maipagarup a “secret deal” wenno limed a katulagan mainaig iti Priority Development Assistance Fund case ni Senador Joel Villanueva.
Inbatad ni Palace Press Officer ken Presidential Communications Office (PCO) Undersecretary Claire Castro, napateg a mapagtalinaed ti talek ti publiko iti sistema ti hustisia ti pagilian isu nga aniaman nga indikasion ti maanomalya wenno limed a katulagan ket nasken a maimbestigaran a naimbag.
Daytoy ti sungbat ni Castro iti report a maipagarup a “secret decision” ni dati nga Ombudsman Samuel Martires iti dismissal case ni Senador Villanueva idi 2016.
Inpetteng ni Castro, nasken a saan a naaddaan ti panagdudua ti publiko iti sistema ti hustisia nangruna ket ti Ombudsman ti kangrunaan nga institusion a lumablaban iti korapsion.
Inallukoy ti Palasyo ni Ombudsman Jesus Crispin “Boying” Remulla a kitaen ti isyu tapno maammoan no adda ti nalabsing a linteg wenno iregularidad.
Innayon pay ti opisial a rumbeng a siguradoen ti Ombudsman nga amin a desision ket dimmalan iti husto a proseso ken addaan ti umiso nga abiso kadagiti maseknan tapno mapagtalinaed ti talek dagiti umili.
