LAOAG CITY – Plano ni Ombudsman Jesus Crispin “Boying” Remulla ti pannakaisubli ti investment ombudsman a gagaemna ti mangsungbat kadagiti isyu dagiti business leaders.
Segun ken ni Remulla, ado dagiti business leaders ken grupo ti agdudua nga agpuonan gapu iti political instability.
Gapu iti daytoy, nagpannawagan ni Remulla a kissayan dagiti requirement para kadagiti negosio a mangipaay ti ado a trabaho kadagiti Filipino.
Iti nasao a pannakaipatungpal, mabalin nga agreklamo dagiti agpuonan iti investment ombudsman no adda dagiti reklamoda iti lebel ti barangay wenno nangatngato pay.
Ti investment ombudsman ket adon nga adminsitrasion ti naggandat a mangisubli tapno sungbatan ti korapsion iti pannakagun-od ti business permit manipud iti gobierno.
Idi 2017, ginandat ni dati a Trade secretary Peter Favila a mangipatungpal ti investment ombudsman iti Department of Trade and Industry.
Inadmitir met ni Remulla nga adda isyu iti ahensia kas ti Anti-Red Tape Authority ken Philippine Competition Commission ngem, saanen a nangipaay ti kanayonan a palawag.
