LAOAG CITY – Nagpanawagan ti Malacañang iti publiko a saan nga agbalin a negatibo kadagiti addang ti gobierno a mangsolbar ti anomalya iti flood control projects.
Daytoy ti sungbat ni Palace Press Officer Undersecretary Atty. Claire Castro kalpasan a nasaludsod mainaig iti komento na iti nagprotesta iti sangwanan ti Independent Commission on Infrastructure compound idiay Taguig City.
Segun kenni Castro, agingga nga adda ti agtrabtrabaho nga addaan ti napintas nga intension ket nasken a suruten ti proseso ken saan a nasken nga agbalin a negatibo no aniaman ti ar-aramiden ti gobierno.
Inbatad ni Castro a nagpila metten ni Public Works and Highways Secretary Vince Dizon ti kaso kontra kadagiti karaman iti iregularidad.
Kageddan iti daytoy ket inbatad ni Castro a saan kuma a maganatan ti publiko ken maaddaan da ti pasensya.
Kabayatanna, nagkomento pay ni Castro iti rakurak dagiti sumagmamano nga student leaders nga alisto a tiliwen dagiti pulis dagiti agprotprotesta ngem saan da a kabaelan nga arestaren dagiti big-time corrupt individuals.
Kuna ni Castro a masapol a determinaren met ti publiko ti
nature ti pannakatiliw da nangruna no dagitoy ket naaktoan nga ar-aramid iti madi.
