LAOAG CITY – Inpakaammo ni Dr. Loida Valenzuela, provincial veterinarian a negatibo ti resulta manipod kadagiti sample a naala da iti nagduduma nga ili kas paset ti surveillance ti bird flu ditoy probinsia.
Kuna ni Valenzuela nga immunan a nagturong ti grupo da iti ili ti Dingras ken Paoay ken simmaruno iti ili ti Solsona ken ditoy ciudad ti Laoag a naalaan ti sample tapno masiguro nga awan iti agraira a flu kadagiti taraken a manok ken dadduma pay a klase ti tumatayab.
Nupay kasta, inbatad iti provincial veterinarian a manarimaan latta iti panagmonitor da kadagitoy ken kalikagum da a mailippas ti surveillance iti intero a probinsia iti kabiitan a panawen.
Maipalagip nga immunan nga inrakurak ni Valenzuela a birdflu-free ti Ilocos Norte ngem kasapulan latta ti naan-anay a panagbantay tapno saanen a maapektaran dagiti agtartaraken.
Kabayatanna, kunana a maysa pay kadagiti imonmonitor da ket dagiti taraken a kalding no sadinno basar iti obserbasion da ket awan ti nakana a sagsagabaen dagitoy nangruna ita a tiempo ti Amihan.
Mainaig iti daytoy, nagpalagip ni Valenzuela kadagiti agtartaraken a taripatoen a naimbag dagiti dingwen.
Kunana nga nga adda dagiti over the counter a medisina a maipaay kadagiti pet owners ken inpasigurado na a makaanay pay dagiti dadduma nga agas para kadagiti ayup.
