LAOAG CITY – Balligi ti naiyuswat a community outreach activity iti Barangay Pangil iti ili ti Currimao idi kalman, Oktubre 25 ita a tawen.
Ti aktibidad ket insayangkat ti Northern Allied Vanguards Finest Eagles Club nga idadaulwan ni Engr. Benny dela Cruz.
Segun ken ni dela Cruz, umabot iti 135 nga households ken 30 nga ubbing ti nabenepisyaran iti insayangkat da nga community outreach activity iti nadakamat a barangay.
Kuna na a karaman kadagiti inbunong da kadagiti benepisyaryo a mangngalap ken dagiti kwalipikado a recipients ket ti food packs, badbado, tsinelas, ken adda pay dagiti inbunong da nga ay-ayam para kadagiti ubbing.
Inpakaammo na a nabukel ti nasao a grupo babaen ti panagtitinnulong dagiti naayat ti panagpuspuso na a tumulong kadagiti umili nga agkasapulan ti tulong, saan laeng a ditoy probinsya no di ket iti intero a pagilian.
Inbatad na a rinugyan da laeng ti misyon da idi Marso ita a tawen no sadinno a binolan nga adda ti pangisayangkatan da ti community outreach activity.
Innayon na a karaman kadagiti lugar a nakaisayangkatan dan ti nasao nga aktibidad ket iti ili ti Pagudpud, Dingras, Bacarra, Burgos, Currimao ken dadduma pay.
Nagyaman ni dela Cruz kadagiti amin a tumultulong iti grupo da ken inkari na nga itultuloy da ti misyon da ken mangnamnama nga ad-ado pay nga umili ti matulungan da.
