LAOAG CITY – Sumagmamano laengen dagiti matiltiliwan nga iligal nga agpukpukan ti kayo iti kabanbantayan ditoy probinsia.
Segun ken Mr. Victor Dabalos, mangidadaulo ti Provincial Environament and Natural Resources, kangrunaan a mapukpukan ket dagiti kayo a makaapektar iti road widening program.
Kunana a basar iti obserbasyon da ket agamak dagiti tattao nga agaramid iti iligal gapu iti naiget a panagbantay dagiti lawin patrol ken Barangay Ranger Officers ditoy probinsia.
Inlawlawag na a dagiti makumkumpiskar a kaykayo ket maipapaay kadagiti agkasapulan kas no adda ti maapektaran ti bagyo – no kasapulan da para iti reconstruction dagiti balay ken dadduma pay a pasdek.
Maipalagip nga immunan nga inrakurak ni Dabalos a bumasbassit ti bilang dagiti mapukpukan a kayo ditoy probinsia.
Innayon na a no ikumpara iti naglabas a tawtawen, manmanu laengen dagiti mairepreport nga illigal nga aktibidad iti kabanbantayan.
