LAOAG CITY – Inpakaammo ni Mayor James Bryan Alcid a ti ciudad ti Loag ti aghost iti National Science and Technology Week 2025.
Segun kenni Alcid, maisayangkat daytoy intono November 18 agingga iti 21 iti Laoag City Multi Purpose Hall ken Laoag City Auditorium.
Napasingkedan daytoy babaen iti Memorandum of Agreement iti nagbaetan ti gobierno siudad nga imbagian ni Mayor James Bryan Alcid ken dagiti opisiales ti Department of Science and Technology nga imbagian ni Dr. Teresita Tabaog, ti Regional Director ti DOST- Ilocos Region 1.
Kaduana da Engr. Brian Rasco, ti Provincial Director iti DOST-locos Norte; Gerald Gabriel nga isu ti Supervising Science Research Specialist ti DOST- Ilocos Norte ken Kent J. Ramil, ti Senior Science Research Specialist ti ahensya.
Inbatad ti Mayor nga agturong ditoy siudad dagiti delegado manipud kadagiti nagduduma a paset ti pagilian ken ditoy a maimatangan dagiti nagduduma met a teknolohia ken partuat dagiti Pilipino.
Kunana nga addan ti nasurok sangarbo nga indibidual ti nakaparehistron iti nasao nga aktibidad.
Kabayatanna, nagyaman ti Mayor gapo ta naikkan ti oportunidad ti ciudad nga aghost iti kastoy a klase ti naindaklan nga aktibidad.
