LAOAG CITY – Inpakaammo ni Mrs. Janet Retamal, ti mangidadaulo ti Commission on Population ditoy ciudad ti Laoag a mangiyuswat dagitoy iti “skills training” para kadagiti ubbing nga inna wenno teenage mother ditoy ciudad.
Segun kenkuana, saan laeng a cash assitance ti ipapaay ti opsina da no diket maipaayan pay dagitoy iti pagtrabahoan a mabalin da a pamastrekan.
Inbatad na a babaen iti daytoy ket masursuro da manen nga ipateg ti bukod da a bagi gapu ta iti nasapa a panagsikog da ket mabalin a napukaw da iti self confidence da.
Kuna ni Retamal a dakkel ti maitulong ti “skills training” tapno matulungan da dagiti annakda ken ti pamilya a buklenda.
Kabayatanna, kunana nga agtultuloy ti panagsusor da kadagiti nagduduma a pampubliko wenno pribado a pagadalan ditoy ciudad tapno mangiyuswat ti information awareness kadagiti agad-adal ken no kasano ti naan-anay a panangtaripato da iti bukod da a bagi, kangrunaan na ti family planning.
