LAOAG CITY – Patien ni Senador Imee Marcos nga adda ti ‘boss’ dagiti contractor ken dagiti engineer ti Department of Public Works and Highways a mairamraman iti isyu ti flood control projects ditoy pagilian.
Inbatadna a dagitoy dagiti rumbeng a maibalud a saan laeng a dagiti opisial ti nasao nga ahensia ken dagiti contractor.
Inlawlawagna a masapul a maiyalisto ti pannakaibalud dagitoy nangruna ket adu metten dagiti ebidensia, adu dagiti dokumento ken impormasion ti naimbestigaranen.
Inpettengna a gapu iti mapaspasamak ket adu dagiti maap-apektaran a babassit a contractor ken adu dagiti naawanan ti trabaho.
Kunana a masapul ti infrastructure investment ditoy pagilian tapno marikna pay ti panagbaba ti ekonomia ti 4% iti maikatlo a kuarter.
Mainaig iti daytoy, inpakaammo ni Sen. Imee Marcos a nagsarita payen ni dati a Congressman Zaldy Co no sadinno a mamati man ti publiko wenno saan ket nakasuportada iti imbestigasion.
Kabayatanna, mamati ti Senadora a ti Discaya ti akin-kontrata kadagiti flood control projects ditoy probinsia nangruna kadagiti binisita ti Independent Commission for Infrastructure gapu ta adu dagiti bumulbulod laeng ti lisensia.
