LAOAG CITY – Inbabawi ni Vice Mayor Rey Carlos Fariñas ti panangidasar na ti maysa a gakat a mangprebentar ken mangipataw ti pannusa kadagiti indibidwal nga adda iti likodan dagiti bomb threats ditoy ciudad ti Laoag.
Daytoy ket kalpasan a naamoan na nga addan ti agdama nga anti-prank call ordinance ditoy ciudad a kapada metlaeng ti gagem na a mabalin da nga i-incorporate ti kalikagom ti opisyal pakaseknan ti bomb threat.
Gapo iti daytoy, inrefer na ti nasao a banag iti Committee on Laws para iti naan-anay a pannakaadal na.
Inlawlawag ti bise mayor a napanunotan na daytoy a banag kalpasan iti nagsasaruno a pannakaawat ti bomb threat ti Mariano Marcos State Univesity iti kallabes.
Inpetteng ti bise mayor a rumbeng a mabigbig dagiti adda ti likodan dagiti bomb threats babaen ti pannakaaramat ti moderno a teknolohiya tapno maikkan dagiti maseknan ti pagnakman da.
Innayon na a mabalin nga estudyante met laeng ti akin-aramid kadagitoy tapno makanselar ti klase da.
Mangnamnama a babaen iti addang ti konseho ditoy ciudad ket maliklikan dagitoy a pasamak ken awan ti mapasaran a panagbettak ditoy probinsya.
