LAOAG CITY – Natiliw ti maysa a lalaki gapu iti panagikot na ti paltog iti paset ti Brgy. 16, San Marcos iti ili ti San Nicolas.
Ti suspek ket agtawen ti 29, naasawaan, plumber ken residente iti Barangay 13, San Eugenio iti metlaeng nadakamat nga ili.
Basar iti report, kabayatan ti panangiyuswat dagiti kameng ti Philippine National Police ti Oplan Bakal ket nakita da dagiti uppat a lallaki a pakairamanan ditoy ti suspek a nakalugan ti kurung-kurong a nagsardeng iti sango ti maysa a tianggi iti nadakamat a barangay.
Iti dayta metlaeng a gundaway ket nakita dagiti kameng ti pulisya ti rumrumuar a paset ti paltog manipod iti sling bag ti suspek.
Adda ti naipakita ti suspek a lisensya ti Armscor MAPI FS Caliber 9mm Pistol nga iggemna ngem awan ti permit to carry firearms outside of residence (PTCFOR) na isut gapuna nga inarestar a dagus dagiti otoridad.
Ti pannakaarestar ti suspek ket naimatangan da Brgy. Chairman Federico Do Simplicianoken ni Brgy. Kagawad Joevy Ramos iti Brgy. 16 iti ili ti San Nicolas.
Iti agdama, agtalinaed ti suspek iti Philippine National Police iti ili ti San Nicolas ken maisagsaganan ti pannakaipila ti kaso a panaglabsing ti Republic Act 10591 wenno Comprehensive Firearms and Ammunition Regulation Act kontra kenkuana.
