LAOAG CITY – Saan a tungpal biag makalisi da Atty. Harry Roque ken Cassandra Li Ong iti responsibilidad da iti pagilian kalpasan a kinanselar ti Pasig Regional Trial Court Branch 157 ti pasaporte da.
Segun kenni Senate Committee on Women and Children Chairman Senator Risa Hontiveros, sumangsango dagiti dua iti nadagsen a kaso a human trafficking.
Kunana a rumbeng a kanselaren ti korte ti pasaporte da, nangruna ket arig na likliklikan da ti linteg ti Pilipinas.
Kumbinsido ti senador nga asidegen a maisubli da ditoy pagilian tapno sangwen dagiti kaso a naipila kontra kadakuada.
Ginutigot pay ni Hontiveros ti gobierno a saan nga agsardeng agingga a dagiti dadduma a sindikato a kriminal a mangipatpataray kadagiti scam hub ti Philippine Offshore Gaming Operators (POGO) ket sumango iti kaso.
Inbatad na a ti pannakaibalud ni dati a Bamban Mayor Alice Guo ket saan nga isu ti paglippasan daytoy.
Sumangsango da Roque ken Ong iti kaso a human trafficking iti Pasig Regional Trial Court .mainaig iti koneksyon da iti POGO Lucky South 99 idiay Porac, Pampanga.
Iti agdama, adda ni Roque idiay Netherlands nga agkidkiddaw ti asylum idinto a naudi a nakita ni Ong idiay Japan.
