LAOAG CITY – Inpetteng ti Department of Foreign Affairs (DFA) a nakanselaren ti dua a pasaporte ti pugante a dati nga agpanpanday linteg a ni Elizaldy Co.
Karaman ditoy ti regular ken diplomatic passport ti dati a kongresista.
Iti maysa a rakurak, inbatad ti ahensia a ti estado dagiti pasaporte ni Co ket insigida a nai-report iti International Criminal Police Organization (Interpol) kalpasan daytoy a kinanselar idi Disiembre iti napalabas a tawen.
Gapu iti daytoy, posible nga “expired” ti pasaporte nga inusar ni Co tapno makadanon iti Czech Republic.
Maipapan iti dadduma a regular passport a nag-expired idi Setiembre 2022 a posible nga inusar ni Co iti panagturong idiay Germany manipud iti Czech Republic, saanen a kasapulan a kanselaren pay gapu ta expired daytoy ken saanen a mausar pay para iti international travel.
Immunan a naipadamag a manarimaan nga adda idiay France ni Co tapno agkiddaw ti political asylum kalpasan a naipadalan iti kustodiar ti Czech Republic gapu iti maipagarup nga immigration violation.
Adda ti pakainaigan ti ar-aramiden a panangbirbiruk iti dati nga agpanpanday linteg gapu iti maipagarup a pannakairamanna iti maanomalya a flood control projects ti gobierno.
