LAOAG CITY – Pormalen nga inrekomendar ti Department of Public Works and Highways ken Independent Commission on Infrastracture iti Ombudsman ti panangipila ti kaso kontra kada dati nga Ako Bicol Rep. Zaldy Co ken pito a dadduma pay nga agpanpanday linteg a karaman iti sumurok 1,300 nga infrastructure projects manipud idi 2016 agingga iti 2024.
Karaman pay kadagiti kongresista a mapilaanen ti kaso da Bulacan 2nd District Rep. Augustina Dominique Pancho, Cagayan 3rd District Rep. Joseph Lara, Surigao Del Norte 1st District Rep. Francisco Matugas, Tarlac 3rd District Rep. Noel Rivera, CWS party-list Rep. Edwin Gardiola, Uswag Ilonggo party-list Rep. James Ang, Jr. ken Pusong Pinoy party-list Rep. Jernie Jett Nisay.
Naammoan a dagiti karaman a nairekomendar a naipila a kaso kontra kadagiti agpanpanday linteg ket ti panaglabsing iti Republic Act No. 7080 wenno Plunder; Sections 3 (a), (b), (e), and (h) ti Republic Act No. 3019 wenno Anti-Graft and Corrupt Practices Act; Art. 210 ti Revised Penal Code on Direct Bribery; Republic Act No. 6713, wenno Code of Conduct and Ethical Standards for Public Officials and Employees; Republic Act No. 9184 wenno Government Procurement Reform Act ken Republic Act No. 12009 wenno ti New Government Procurement Act ken Article VI, Section 14 ti 1987 Philippine Constitution.
Mainaig iti daytoy, inpila da Independent Commission on Infrastracture Chairman Andres Reyes Jr. ken Department of Public Works and Highways Sec. Vince Dizon dagiti kaso iti Ombudsman.
Inpasigurado ni Ombudsman Remulla nga insigida a trataren ken tingitingenda dagiti naipila a kaso.
