LAOAG CITY – Mariknan dagiti 1,648 senior citizens a maibilang nga indigents ken addaan ti an-anayen ti bagi ti ayat ken pannarabay kadakuada ti gobierno.
Daytoy ket kalpasan a naawat dan ti social pension babaen ti pannakikammayet ti Department of Social Welfare and Development ken ti gobierno lokal ditoy ciudad ti Laoag.
Iti kada benepisyaryo ket makaawat ti sangaribo a pisos iti kada bolan ken mait-ited iti kada tallo a bolan.
Ibilang dagiti maseknan a dakkel a pakalag-anan da ti maaw-awat da a tulong pinansyal manipod iti gobierno gapu ta isu ti nayun dagiti pagkasapulan da iti inaldaw.
Naibalakad met kadagiti saan pay a makaaw-awat ti social pension ditoy ciudad ti Laoag a makikoordinar laeng iti senior citizens office iti barangay wenno iti ciudad tapno madeterminar no kwalipikado dagitoy nga agbalin a benepisario.
Malaksid ti social pension a benepisio, adda pay ti milestone awards a financial assistance para kadagiti senior citizens ditoy ciudad ti Laoag nga agtawen 70 agpangato.
