LAOAG CITY – Inawagan nga “unrealistic” wenno saan a nainkalintegan ni Senate Committee on Finance chairman Senador Sherwin Gatchalian ti P500 a budget para iti Noche Buena nga inkeddeng ti Department of Trade and Industry (DTI).
Inbatad ni Gatchalian a saan nga umanay ti P500 para iti maysa a pamilia nga addaan ti lima a miembro.
Kunana nga uray kadagiti gagangay a taraon a pagsasangoan ket narigat nga i-budget iti balor a lima a gasut a pisos nangruna no gumatang wenno ikonsiderar ti panaggatang ti karne.
Mainaig iti daytoy, idi nasaludsod no kasano ti pinamay-an ti Department of Trade and Industry tapno maala ti nasao a balor, kuna ni Gatchalian nga uray ti presio dagiti budget meal iti fast-food ket saan a maipada iti pudno a gastos iti panagsagana para iti Noche Buena.
Inpetteng ni Gatchalian nga iti baet nga adda dagiti arungaing ti publiko, nagun-od met ti administrasion ti nababa nga inflation daytoy kadagiti naglabas a quarters.
Nupay kasta, inlawlawagna a ti pudno a napateg ket ti panangpatalinaed ti nababa a presio tapno saan a marigatan dagiti umili.
