LAOAG CITY – Posible a sumango ni Cavite 4th District Rep. Kiko Barzaga iti pannusa a nadagdagsen ngem iti 60 nga aldaw a pannakasuspensona nga inpataw ti Kamara kenkuana.
Inbatad ni House Committee on Ethics and Privileges ken 4Ps Partylist Rep. JC Abalos, daytoy ket iti kanito a saan nga ikkaten ni Barzaga dagiti social media post-na a nakaipalaon iti sangsangoen daytoy nga ethics complaint.
Inlawlawagna a ti panangikkat kadagiti iresponsable a social media posts ket rumbeng nga aramiden ni Barzaga iti uneg ti 24 nga oras sipod idi inyetnag ti Kamara ti pannusa kenkuana.
Kunana a karaman iti pannakasuspenso ken ni Barzaga ti pammilin ti Kamara nga ikkatenna dagiti sensitibo ken pammerperdi a posts a nakadadael iti dignidad, integridad ken reputasion dagiti dadduma nga opisial ken dagiti insitusion ti gobierno.
Innayonna a no mapaay ni Barzaga nga ikkaten ti maiyannatop a social media posts ket pagsasaritaan dagiti miembro ti komite ti nadagdagsen a pannusa a mabalin a maipataw kenkuana.
